ფსიქოთერაპია არის ინდივიდის ჯანმრთელობის, ცხოვრების ხარისხის გაუმჯობესების, პრობლემების გააზრებისა და მათი მოგვარებისაკენ მიმართული თერაპიული სისტემა. ფსიქოთერაპიის მეთოდები და ტექნიკები მრავალგვარია და თითოეული მათგანი მიზნად ისახავს პიროვნების დახმარებასა და კეთილდღეობის გაუმჯობესებას. ფსიქოთერაპიის განხორციელება ხდება მკაცრად განსაზღვრული ეთიკის და კონფიდენციალობის გათვალისწინებით. თერაპიულ პროცესში ჩართულ ადამიანებს, აქვთ სივრცე, სადაც თავისუფლად გამოხატავენ საკუთარ გრძნობებს, ფიქრებსა და ქცევებს, ამასთან, აქვთ შესაძლებლობა აღმოაჩინონ მათი პრობლემის მოგვარების ადეკვატური გზები. აღსანიშნავია, რომ თერაპიული სესიის დაგეგმარება და თერაპიული მეთოდის შემუშავება ხდება პაციენტთან შეთანხმებით, მისი კონკრეტული საჭიროებებიდან გამომდინარე. ფსიქოთერაპიული სესიის ხანგრძლივობა მერყეობს 45 წუთიდან 60 წუთამდე და რეკომენდირებულია, კვირაში ერთი შეხვედრა. სამუშაო პერიოდი განისაზღვრება ინდივიდის პრობლემის, მისი მოტივაციის და საჭიროებების მიხედვით. ფსიქოთერაპიის თანამედროვე მტკიცებულებებზე დაფუძნებული მიმართულებებია: კოგნიტურ-ქცევითი თერაპია, რომელიც გამოიყენება შიშებთან და ფობიებთან, ობსესიურ-კომპულსურ აშლილობასთან და დამოკიდებულების მდგომარეობებთან სამუშაოდ. EMDR თერაპია, რომელიც ტრავმასთან და ტრავმული გამოცდილებების მოგვარებისთვის გამოიყენება შემაშფოთებელი სტიმულების ხელახლა განცდის გზით. არტ თერაპია- ხელოვნების თერაპიის მეთოდი, რომელიც ადამიანებს აძლევს საშუალებას საკუთარი ემოციები, გრძნობები და პრობლემები გამოხატონ ხატვის, ძერწვის, ქვიშათერაპიის და სხვა ხელოვნების დარგების საშუალებით, თანამედროვე კვლევების მიხედვით, ნევროზულ აშლილობებთან და ფსიქოზურ მდგომარეობებთან სამუშაოდ აღიარებული თერაოიული მიმართულებაა. გეშტალტთერაპია- ორიგინალური ტექნიკებისა და პრინციპის „ აქ და ამჟამად ყოფნა“ ანუ აწმყოში ცხოვრების აქცენტირებით, ეხმარება ინდივიდებს მიმდინარე სირთულეების დაძლევაში. ფსიქოანალიზი- თანამედროვე ფსიქოანალიზი იძიებს ბავშვობის ან ადრეული პერიოდის ტრავმულ გამოცდილებებს და ცდილობს მათი დამუშავების გზით, ინდივიდის აწმყო ცხოვრების ხარისხის გაუმჯობესებას.