ჯგუფური თერაპია არის თერაპიული მიმართულება, რომელიც განკუთვნილია ისეთი პრობლემების დასაძლევად, როგორიცაა: დეპრესია, შფოთვა, სოციალური ფობიები (შიშები), ქრონიკული ტკივილი, ნივთიერებებზე დამოკიდებულება, გემბლინგი (აზარტულ თამაშებზე დამოკიდებულება), კვებითი დარღვევები (ანორექსია, ბულიმია), აგრესიულობა, გადაჭარბებული სიმორცხვე, მარტოობის შეგრძნება, დაქვეითებული თვითშეფასება და სხვა. ჯგუფური თერაპიის ხანგრძლივობა განისაზღვრება 60-დან 120 წუთამდე და შეიძლება ჩატარდეს ჰომოგენურ ( ერთი პრობლემის მქონე) ან ჰეტეროგენულ (სხვადასხვა პრობლემის მქონე) ჯგუფებში.
ჯგუფური თერაპიის მიზანია ადამიანმა შეძლოს განსხვავებული და საწინააღმდეგო აზრის მოსმენა, გათვალისწინება და დიალოგის წარმოება. თერაპიის მიმდინარეობისას ერთ – ერთი ამოცანაა გაუმჯობესდეს პაციენტის თანაგრძნობისა (ემპათიის) და თვითშეფასების ხარისხი. ჯგუფური თერაპიის მიმდინარეობისას თერაპევტი იყენებს მის ხელთ არსებულფსიქოთერაპიულ მეთოდებს და ტექნიკებს, ჯგუფის წევრების პრობლემების მოგვარებისთვის და ითვალისწინებს ჯგუფის წევრთა სურვილებსა და საჭიროებებს.
ჯგუფური თერაპია საშუალებას იძლევა ადამიანებმა სხვისი თვალით შეხედონ საკუთარ თავს და პრობლემებს. შექმნან ურთიერთობის მოდელი (აქ და ახლა), სადაც გამოიყენებენ ან დახვეწენ საკუთარ სოციალურ უნარ-ჩვევებს, გაითვლისწინონ სხვათა რეაქციების მრავალფეროვნება მათი ქცევის მიმართ და მიიღონ მხარდაჭერა და პრობლემის მოგვარების ტექნიკებსა და მეთოდებზე ინფორმაცია, თერაპევტისგან და ჯგუფის წევრებისაგან.
ჯგუფური თერაპიის მიზანია, ადამიანებს ხელი შეუწყობს ემოციების გამოხატვისა და მათი მართვის, კომუნიკაციის უნარების დახვეწის, თანაგანცდის, პრობლემებიდან ყურადღების გადატანის და მათი მოგვარების ადეკვატური გზების სწავლებაში. თანამედროვე ფსიქოლოგიური კვლევები ამგვარ თერაპიულ მუშაობას დადებითად აფასებს, თერაპიული პროცესის მონაწილე ინდივიდების ცხოვრების ხარისხის გაუმჯობესების საფუძველზე.