EMDR (თვალის დესენსიტიზაციისა და რეპროცესირების მეთოდი) დღესდღეობით ყველაზე ეფექტური მეთოდია პოსტტრავმული სტრესული აშლილობის და პოსტტრავმული სტრესისგან გამოწვეული პრობლემების სამკურნალოდ.
აღნიშნული ფსიქოთერაპიული მეთოდი პირველად საქართველოში, 2015 წელს, დაინერგა ჰოლანდიელი სპეციალისტების (Walther Van Lieshout, Rianneke van der Gaag) დახმარებით, „სტრესის მართვისა მენტალური ჯანმრთელობის ცენტრის“ ბაზაზე. სწავლება განხორციელდა ორ ეტაპად: პირველ ეტაპზე მოხდა მეთოდის ათვისება, შემდგომ ეტაპზე კი მოხდა კლინიკის სპეციალისტების მიერ ჩატარებული თერაპიების ანალიზი და პროცესის ეფექტურობის შეფასება. EMDR თერაპიის სასწავლო სესიებზე ათვისებული დეტალური პროტოკოლებისა და პროცედურების გამოყენებით, EMDR თერაპია დანერგვის დღიდან აქტიურად გამოიყენება ცენტრის ფსიქოლოგის ნანა მამულაშვილის მიერ პოსტტრავმული სტრესული აშლილობების სამკურნალოდ.
მეთოდის უპირატესობებს წარმოადგენს სწრაფი შედეგი, რადგან თერაპიული მუშაობის ხანგრძლივობა მოიცავს 4-6 სეანსს და მისი მაღალეფექტურობა. ცენტრში თერაპია ტარდება შესაბამისი ინსტრუმენტის გამოყენებით (EMDR Kit 2_2017), რომელიც მკვეთრად ზრდის თერაპიის კომფორტულობასა და ეფექტურობას.
კვლევები მიუთითებს, რომ EMDR თერაპიის გამოყენებით ადამიანებს შეუძლიათ დროის ხანმოკლე პერიოდში მიიღონ იგივე სარგებელი, რასაც ფსიქოთერაპია იძლევა გრძელვადიანი მუშაობის შედეგად. გავრცელებულია ვარაუდი, რომ მძიმე ემოციური ტკივილის განკურნებას დიდი დრო სჭირდება, თუმცა EMDR თერაპია აჩვენებს, რომ გონებას რეალურად შეუძლია განკურნოს ფსიქოლოგიური ტრავმა, ისევე როგორც სხეული აღდგება ფიზიკური ტრამვისგან.
EMDR თერაპიის დროს კლიენტი თვალს ადევნებს ემოციურად შემაშფოთებელ სტიმულებს იმისთვის რომ შეძლოს საკუთარი სტრესული გამოცდილებების ხელახლა განცდა, მათი გაანალიზება და შფოთვის ხარისხის შემცირება.
EMDR თერაპიით წარმატებული მკურნალობის შემდეგ იხსნება აფექტური დისტრესი, ნეგატიური რწმენების პოზიტიური წარმოდგენებით ჩანაცვლება ხდება და ფიზიოლოგიური აგზნება მცირდება.