ხელოვნებით თერაპია დიაგნოსტიკური, თერაპიული და რესურსული მკურნალობის მეთოდია, რომელიც ადამიანებს საშუალებას აძლევს მათთვის არასასიამოვნო განცდები სოციალურად მისაღები ფორმით, ხელოვნების სხვადასხვა საშუალებით გამოხატონ. არტ თერაპიის მეთოდები მრავალგვარია და მოიცავს: ხატვას, ძერწვას, თიხაზე მუშაობას, მანდალა თერაპიას, ზღაპარ თერაპიასა და მუსიკა თერაპიას.
არტ თერაპიის მიდგომები განსხვავებულია სხვადასხვა ასაკობრივი ჯგუფებისა და სხვადასხვა სირთულეების მქონე ინდივიდიდებისთვის. თერაპიული მეთოდი მუშაობის პროცესში ითვალისწინებს ინდივიდის სოციალურ გარემოს, მიდრეკილებებსა და ხასიათის პიროვნულ თავისებურებებს. არტ თერაპიული მუშაობა შესაძლოა განხორციელდეს როგორც ინდივიდუალურად, ასევე ჯგუფურად ან ამ ორი მიდგომის ერთმანეთში მონაცვლეობით.
ხელოვნებით თერაპია ეფექტურია ისეთი პრობლემის დროს როგორიც არის: შიშები, შფოთვა, დეპრესია, ქცევის პრობლემები, აკვიატებული აზრები და ქმედებები და სხვა. თერაპიული მიმართულება ინდივიდს ეხმარება უსიამოვნო ფიქრებიდან ყურადღების გადატანაში, საკუთარი თავის უკეთ გაცნობაში, პრობლემების მიღებასა და სახელდებაში, ემოციურ განმუხტვას და რაციონალური ბალანსის აღდგენაში.