ფსიქოგანათლება მიზნად ისახავს კლიენტის ინფორმირებას და მხარდაჭერას დაავადებებისა და პრობლემების უკეთ გაგებისა და მათთან ეფექტურად გამკლავებისთვის. ეს არის მტკიცებულებებზე დაფუძნებული მეთოდი, რომელიც ეხმარება სხვადასხვა აშლილობის ან დაავადების მქონე ადამიანებს საკუთარ პრობლემებში გარკვევასა და დაძაბულობის შემცირებაში. ფსიქოგანათლება გულისხმობს ფსიქიკური ჯანმრთელობისა და კეთილდღეობის სწავლას და გაგებას. იგი შეიძლება შევადაროთ ფიზიკურ აღზრდას, სადაც ვწავლობთ, თუ როგორ მუშაობს ჩვენი სხეული და როგორ უნდა ვიზრუნოთ მასზე. ფსიქიკური ჯანმრთელობისა და მისი გაუმჯობესების გზების ცოდნა არის მნიშვნელოვანი ნაბიჯი საკუთარი თავის გაგებისა და მასზე ზრუნვისათვის.
ოჯახის წევრების ფსიქოგანათლება
ინდივიდის ფსიქიკური სირთულეების მიღება და სწორი დახმარების გაწევა ხშირად რთულია სირთულეების მქონე ინდივიდის ოჯახისთვის. ოჯახის წევრების ფსიქოგანათლება არის მეთოდი, რომელიც მიზნად ისახავს პაციენტის ოჯახისთვის პრობლემის გადაჭრისა და კომუნიკაციის უნარებს სწავლებას. ასევე, იგი უზრუნველყოფს კვალიფიციური ინფორმაციისა და რესურსების ხელმისაწვდომობას მხარდამჭერი გარემოს დახმარებით. ოჯახის წევრების ფსიქოგანათლებას ახორციელებენ ფსიქიკური ჯანმრთელობის სფეროს მუშაკები: ფსიქიატრები და ფსიქოლოგები. ფსიქოგანათლება მიმართულია დაავადების მიმდინარეობის, რისკების, პაციენტთან კომუნიკაციის და მხარდაჭერის ტექნიკების სწავლებასა და დამხმარე სტრატეგიების გამოყენების შესახებ ოჯახისთვის რეკომენდაციების მიწოდებაზე. ოჯახის წევრების ფსიქოგანათლების მნიშვნელობას ხაზს უსვამს, ბოლო წლებში ჩატარებული 30-ზე მეტი კვლევა, რომელიც მიუთითებს, რომ კომპეტენტური პირებისგან მიღებული ფსიქოგანათლება აუმჯობესებს პაციენტის და მისი ოჯახის წევრების კეთილდღეობას, ამცირებს რეციდივის რისკსა და ზრდის პაციენტის გამოჯანმრთელების ხარისხს.